علشان الشعب يفهم احنا
بندافع على ايه وليه ويفهمنا
لازم تعرفوا مفاهيم كلامنا
الديمقراطية ياشعب
يعني ببساطه هي عدم الحجر على افكارك
يعني لما تحب تتناقش وتتكلم تلاقي الكل بيسمعك وبيناقشك
وبيديك حرية التعبير عن كل اللي جواك من غير ما يقول لك
انت مبتفهمش ولا انت مش على قد مستوى الحوار
ده ممنوع وده يزعل الحكومه وده يحبسك وده وده .....!
علشان كده لما نادينا بيها كان هو ده هدفنا
اننا لما نحب نقول لا للظلم نقولها من غير خوف ولا قهر
وده أول مفهوم كان لازم نشرحهلكم علشان تكونوا معانا
*******************************
تاني مفهوم ياشعب وهي الحرية
وهي لا تقل أهمية عن الديمقراطية
لانها العامل المساعد ليها
والمقصود بها بردو ببساطه
انك تكون انسان حر غير مقيد في افكارك ولا في حياتك
يعني لما تحب تعترض على الرئيس تطلع تقول
انك ياريس خذلتني في اختياري ليك
ومافيش اي عقاب يقع عليك .. ا
لحريه هي ان تعيش بكل انسانية في بلدك
وتتعامل مع كل ركن في بلدك من غير ما يكون في اي اهانه ليك
او قوانين تجعلك غير قادر على انك تعيش في وطنك
*******************************
ام المصطلح الأخير وهو العدالة الإجتماعية
ودي بـ إختصار ياجماعه انك تكون مواطن مصري
بصرف النظر عن تعليمك او منصبك او مستواك الإجتماعي
الوزير زي العفير زي عامل النظافه زي الضابط زي الدكتور
زيك زي اي حد في بلدك من غير اي فروق
ولا تقول منور ياباشا ولا اهلاً يافندي ولا ازيك يابيه
زيك زي اي انسان مصري
وهي دي الصفات اللي طلبنا تكون في بلدنا
وبعد ما عرفتوا شباب الثورة كانت عايزه ايه ليكم
دلوقتي من حقكم تختاروا
من غير ما حد يتكلم على لسانكم
ويقول الشعب يريد كذا او كذا ...
وأتمنى اكون قد وفقت في عرض وجهة نظري